Vlerat e fjalës La ilahe il-Allah

2 – Vlerat e fjalës La ilahe il-Allah



Vlerat e saj janë madhështore dhe Allahu i Lartësuar i dha pozitë asaj. Kush e shqipton atë me sinqeritet, Allahu e futë në Xhennet, ndërsa ai që dëshmon rrejshëm, mbrohet gjaku i tij dhe ruhet pasuria e tij në dynja, kurse llogaria e tij është te Allahu. Është fjalë me tekst të shkurtër, me pak shkronja, e lehtë për gjuhën dhe e rënd në peshore. Transmeton ibn Hibani, gjithashtu edhe Hakimi dhe e vërteton nga Seid el-Huduriu, se Pejgamberi ka thënë:



"Musai tha:'O Zot, ma mëso një gjë që të të përkujtoj dhe të të lus (adhuroj) me të.'



'O Musai, thuaj La ilahe il-Allah.'



'Të gjithë robërit e Tu e thonë atë!' – tha ai.



'O Musai, sikur shtatë qiejt dhe çka ka në to përveç Meje, dhe shtatë tokat të vihen në njërën anë të peshores, kurse La ilahe il-Allah në anën tjetër, i ngreh ato La ilahe il-Allah.'"



Hadithi tregon se fjala La ilahe il-Allah është dhikri më i mirë. Në hadithin e Abdullah bin Omerit thuhet:"Du'aja më e mirë është ajo në Arafat. Fjala më e mirë që kam thënë unë dhe Pejgamberët para meje është La ilahe il-Allahu vahdeu la sherike lehu, lehu el-mulku ve lehu el-hamdu ve huve ala kuli shejin kadir". (E transmetojnë Ahmedi dhe Tirmidhiu).



Prej haditheve që argumentojnë se ajo peshon rënd në peshore, është gjithashtu edhe hadithi që e transmeton Tirmidhiu dhe thotë se është hasen. Gjithashtu e transmeton Nesaiu dhe Hakimi, dhe ky i fundit thotë:"sahih (i saktë) sipas kushteve të Muslimit, prej Abdullah bin Amrit se Pejgamberi ka thënë:'I bëhet thirrje një njeriu prej umetit tim në mesin e krijesave Ditën e Kiametit dhe i shfaqen nëntëdhjetë e nëntë regjistra, secili8 sa fusha e të parit, pastaj i thuhet atij:



'A mohon diçka prej kësaj?'



'Jo, o Zot!' - përgjigjet ai.



I thuhet:'Për këtë që ke punuar, a ke ndonjë arsye, ose a ke ndonjë të mirë?'



'Jo!' - thotë i tronditur.



I thuhet:'Si jo! Ti ke mirësi tek Ne dhe sot nuk të bëhet padrejtësi.' I nxirret një skedë në të cilën është shënuar: Eshhedu en la ilahe il-lAllah ve eshhedu enn Muhammeden abduhu ve resuluhu.



'O Zot, çfarë vlere ka kjo skedë përballë këtyre regjistrave.'



I thuhet:'Vërtet që ty nuk të bëhet padrejtësi.' Vendosen regjistrat në njërën anë të peshores kurse skeda në anën tjetër, dhe (ngrihen) vijnë lehtë regjistrat dhe peshon rënd skeda.



Vlerat e kësaj fjale madhështore janë të shumta, tërësinë e të cilave i ka përmendur ibën Rexhebi në librin e tij të quajtur "Fjala e Sinqeritetit", dhe e ka argumentuar çdonjërën prej tyre:"Ajo është tarifa e xhenetit, dhe se fjala e fundit e kujtdo që është ajo, ai hyn në xhenet, shpëton nga zjarri, sjell faljen, është më e mira e mirësive, i fshin mëkatet dhe gabimet, ripërtërinë në zemër atë që është mësuar prej Imanit, rëndon peshoren përball regjistrave të mëkateve, dhe shkrumbon perdet derisa të arrijë tek Allahu. Shqiptuesi i saj është i çiltër tek Allahu. Është më e mira që kanë thënë Pejgamberët dhe është dhikri më i mirë. Është më e mira e veprave dhe i shumëfishon ato. Barazohet me lirimin e skllevërve dhe është mburojë nga shejtani. Është siguri për trishtimin e varrit dhe frikën e tubimit (për të dhënë llogari). Ajo është parulla e besimtarëve kur ngrihen nga varret. Ajo ia hap shqiptuesit të saj tetë dyert e xhennetit dhe hyn nga cila të dojë. Prej mirësive të saj gjithashtu është se të zotët e saj edhe në qoftë se hyjnë në zjarr për mosplotësimin e detyrimeve të saj, ata patjetër do të dalin". Këta janë titujt për vlerat e saj, që ibën Rexhebi i ka cekur në broshurën e tij dhe e ka argumentuar çdonjërën prej tyre.



--------------------------------------------------------------------------------
8. Gjatësia dhe gjerësia e çdo regjistri është sa fusha e të parit të njeriut.